Rapid turnirinin qalibi bəlli olub
Naxçıvan Muxtar Respublikası Gənclər və İdman Nazirliyinin "İdman həftəsi" adlı tədbirlər proqramına uyğun olaraq 5 Mart – Bədən Tərbiyəsi və İdman Günü ilə bağlı fəaliyyətlər davam etməkdədir.
Martın 4-ü Naxçıvan Şahmat Mərkəzində şahmat üzrə rapid turniri keçirilib. Gənclər və İdman Nazirliyinin dəstəyi, Naxçıvan Şəhər Uşaq-gənclər Şahmat Məktəbinin təşkilatçılığı reallaşan yarışda müxtəlif yaş qruplarına mənsub 32 şahmatçı mübarizə aparıb.
Nəticələrə əsasən 9 turun yekununda 8 xal toplayan FIDE ustası Sadiq Məmmədov turnirin qalibi olub. Hər ikisi 7 xal topladığından şəxsi əmsallar arasındakı fərqlə Mirsaleh Seyidli ikinci, Yasin Əzimov isə üçüncü yerə layiq görülüb.
Adıçəkilən şahmatçılara diplom və pul mükafatı təqdim olunub. Nominasiya qalibləri və yaş kateqoriyaları üzrə yer tutan iştirakçılar da təltif olunublar. Mükafatları gənclər və idman naziri səlahiyyətlərini icra edən, nazir müavini Məcid Seyidov təqdim edib.
Qeyd edək ki, "İdman həftə"si martın 5-i idman ictimaiyyəti ilə keçiriləcək görüş və mükafatlandırma tədbiri ilə yekunlaşacaq.
